Sunshine, lalong dumami ang trabaho (Kahit apat na taong nawala sa showbiz)

BUWENA-MANONG nagpa-Christmas party ang PPL Entertainment Inc., na pinangungunahan mismo ng President at Chief Executive Officer nitong si Perry P. Lansigan sa entertainment press noong Martes sa Bella Ibarra, Quezon Avenue, Quezon City.

Bagong pasok sa PPL Entertainment si Sunshine Dizon at nagpapasalamat siya dahil mainit siyang tinanggap ng mga kapatid niya sa nasabing talent agency.

Medyo na-late ng kaunti si Sunshine dahil nanggaling pa siya sa Walk of Fame na ginanap sa Eastwood, Libis Quezon City.

“Sobrang nakaka-proud at sobrang happy po, thank you kay tatay (German Moreno) kasi nararamdaman ko hanggang ngayon ‘yung suporta sa aming mga anak niya (‘That’s Entertainment’) and you know, it’s so nice to know that alam ni tatay ‘yung hardwork na ginagawa namin at na-recognize niya ‘yun,” sabi ng aktres.

Apat na taong nawala sa showbiz si Sunshine dahil nag-asawa at nagka-anak ng dalawa at dalawang taon na siyang nakabalik at sunod-sunod daw ang projects niya sa GMA 7 na labis niyang ikinatutuwa dahil kahit na maraming bagong mukha na ngayon ay hindi naman siya nabakante.

“Magtu-two years pa lang po akong nakababalik at ‘yung first year ko, I did ‘Mundo Mo Ay Akin’, ‘Villa Quintana’. In my second year, I did ‘Strawberry Lane’ and ‘Parikoy’ and now, I’m doing ‘Little Nanay’.

“Tapos nakapag-indie film din po ako, I did ‘Kamkam’ (kasama sina Jackie Rice, Allen Dizon at Jean Garcia) and then ‘Hustisya’ (Nora Aunor, Rosanna Roces, for Cinemalaya 2015) and then very recent is ‘Sekyu’ (Allen Dizon). I don’t know when it gonna be shown dito sa Philippines. Ilalaban siya abroad po,” kuwento ni Sunshine.

Mahabang panahong walang talent manager si Sunshine, ” that’s why I decided to sign up with Perry.”

Samantala, ire-remake ng GMA 7 ang Encantadia at isa sa original cast ng nasabing fantaserye si Sunshine sa papel na si Pirena at panganay na anak ni Dawn Zulueta bilang si Ynang Pirena Minea.

Tinanong namin kung inalok na ba siya para sa remake na ipalalabas sa 2016.

“As of now wala pa pong nasasabi but you know, if ever na kasama ako, siyempre I’ll be honored. Sana po, let’s keep our fingers cross.

“At kung hindi naman (makasama) at talagang bagong cast (lahat), I hope that ‘yung fans namin from the original ‘Encantadia’ will still support the new one,” nakangiting sabi ni Sunshine.

Ipinakita ng aktres ang mga litrato ng mga anak niya na parehong cute at base sa nakikita ni Sunshine ay tila walang hilig mag-artista.

FACT SHEET – Reggee Bonoan