Binay at Mar ang tirador

LUMABAS din ang katotohahan nang tukuyin mismo ni Sen. Grace Poe na sina Mar Roxas at Vice President Jojo Binay ang may pakana ng mga ‘paggiba’ sa kanya, partikular ang disqualification ca-ses na inihain laban sa kanya sa Commission on Elections (Comelec).

Bagamat mabilis na itinanggi ng kampo nina Roxas at Binay ang akusasyon, halos ang lahat ay naniniwala na may kinalaman ang Liberal Party (LP) ni Roxas at  United Nationalist Alliance (UNA) ni Binay sa mga ‘paggibang’ ito laban sa senador.

Nangunguna si Poe sa lahat ng survey ng Pulse Asia at Social Weather Station, habang sina Roxas at Binay ay naglalaban para sa ikalawa at ikatlong pwesto.

Si Atty. Estrella Elamparo na nagsampa ng kasong disqualification case na una nang denisisyonan ng Comelec second division, ay senior partner  ng Divina and Uy Law Office. Itinatag ang nasabing law firm ni Dean Nilo Divina ng UST Faculty of Civil Law.

Sinasabi na si Divina ay supporter ng LP at  malapit na kaibigan ni Comelec Chairman Andres Bautista.  Si dating Isabela congressman at Vice Governor Edwin Uy, ay co-founder ng nasabing law office, ay miyembro ng LP.

Hindi rin maaaring itanggi ni Binay na wala siyang kinalaman dito dahil sa simula pa lang, ang tagapagsalita niya ang harapang umupak kay Poe na hindi nga raw natural born Filipino at kuwestiyonable rin ang residency.

Hindi patas kung lumaban ang LP at UNA, at dito makikita kung anong uring presidential candidates meron sila.