HATAW! D'yaryo ng Bayan hatawtabloid.com
MAGANDA ang lugar na pinagsusyutingan ng All We Need Is Pag-Ibig sa Coron, Palawan base sa mga nakikita naming post sa social media kasabay ng pag-post din sa Instagram account ni Kris Aquino na naka-bathing suit siya pero nakatalikod naman at napansin naming pumayat.
Pawang positibo ang mga komentong nabasa namin sa post na ito ng TV host/actress at waiting sila na mapanood ang nasabing pelikula na idinidirehe ni Antoinette Jadaone.
Big scene ang nakita naming eksena sa beach at ang aga nga raw ng call time kasi hinabol ang day effect. Kinumusta namin si Kris sa ilang araw niyang pananatili sa Coron, Palawan at nabanggit pa naming nakapagpahinga siya dahil malayo sa polusyon, ingay ng showbiz.
Aniya, “exhausting, packed up ng after 4AM (Martes ng madaling araw), resumed again by 10 (AM), naghahabol ng day effect, pero super beautiful-as in CINEMATIC talaga.”
Hindi na kami sinagot ng Queen of All Media kung ano ang mga eksenang kinunan na kasama si Derek. Ramsay.
May taga-production kaming natanungan at nabanggit na cute raw ang eksena ni Derek nang makita siya ni Kris sa kubo nito at dito raw nagsimula ang friendship nila na in the end ay magiging lovers.
Tinanong namin kung bakit sa Coron, Palawan pa ang shooting, eh marami namang beach resort na mas malapit?
“Iba po kasi ang Coron, ang ganda ng lugar at perfect po ito sa mga taong nag-a-unwind at ‘yung mahilig sa diving,” kuwento sa amin.
At dahil napo-promote ang nasabing resort sa All We Need Is Pag-Ibig ay tiyak na magiging puntahan ito ng mga tao oras na napanood nila ang pelikula sa December 25 na entry ng Star Cinema sa Metro Manila Film Festival.
‘Di ba’t ganito rin ang nangyari sa That Thing Called Tadhana nina JM de Guzman at Angelica Panganiban na idinirehe rin ni Jadaone, naging sikat bigla ‘yung mga lugar na pinuntahan ng dalawa, Ateng Maricris.
Going back to shooting ng All We Need Is Pag-Ibig ay hanggang December 2 doon ang grupo.
Samantala, nagkaroon ng isang araw na libre si Kris kaya’t nakapag-shoot siya ng Kris TV.
ni Reggee Bonoan
