Bigtime lady shabu dealer sa Bulacan arestado (P.7-M droga kompiskado)

TINATAYANG aabot sa P700,000 halaga ng shabu ang nakompiska ng mga awtoridad mula sa isang bigtime drug dealer sa isinagawang buy-bust operation sa San Jose del Monte City, Bulacan kamakalawa.

Kinilala ni Director General Usec. Arturo Cacdac, Jr., chairman ng Philippine Drug Enforcement Agency (PDEA), ang nadakip na si Mona Salanggi, 27, ng Brgy. Muzon, sa naturang lungsod.

Ayon sa ulat, si Salanggi ay nasa watchlist ng drug personalities  ng PDEA Regional Office 3 simula Oktubre 2015, at kilala bilang bigtime supplier ng shabu sa lungsod.

Napag-alaman, nagsagawa ng buy-bust operation ang PDEA sa pamumuno ni Director Gladys Rosales, sa parking lot ng isang supermarket sa Brgy. Muzon na nagresulta ng pagkakadakip sa suspek makaraang magbenta ng droga sa isang poseur buyer.

Nakapiit na si Salanggi sa PDEA RO3 jail facility at nahaharap sa mga kasong paglabag sa Section 5 (Sale of Dangerous Drugs), ng Article II ng Republic Act 9165, Comprehensive Dangerous Drugs Act of 2002.