HATAW! D'yaryo ng Bayan hatawtabloid.com
Ngayon pa lang, marami na ang mga kababayan natin ang ninerbiyos kapag nakapasok sa Senado si dating MMDA Chairman Francis Tolentino.
Abogado kasi si Tolentino habang ang kanyang pamilya ay sinasabing tumitiba ngayon sa real estate business sa Tagaytay na ang mayor ay kanyang utol na si Bambol.
Huwag na tayong lumayo, sa real estate naging milyonaryo si dating Senador Manny Villar, at ganoon din ang claim ni Bro. Mike Velarde ng El Shaddai.
Kumbaga, talagang magandang business venture ang real estate na nililinyahan ngayon ng mga Tolentino.
Kaya nga ang sabi ng mahihirap at maliliit na taga-Tagaytay, malamang na hindi sila makapag-angkin ng lupa sa nasabing lalawigan kapag naging Senador si Francis…
Ang tanong natin, bakit?
Kasi raw, ang kalakaran ngayon sa Tagaytay napakahirap magpatitulo ng lupa kung residential lang at alam agad na pangkaraniwang mamamayan lang at maliit na empleyado.
Pero kapag negosyante umano, matulin pa sa alas-kuwatro. ‘Yun lang daw, bukod sa goodwill at SOP ‘e tosgas talaga sila nang malaki.
‘Yan ‘e kung walang kalaban na mas kayang magbayad nang mas malaki.
‘E kung mayroong mas malaki magbayad tiyak sila ang makapagpapatitulo.
At ‘yan po ang pangunahing pangamba ng mga taga-Tagaytay.
Nauna pa raw dumami ang mga condo at business establishments sa Tagaytay kaysa public schools para sa mga anak ng mga magsasaka at malilit na manggagawa.
Kumusta na ang Tagaytay Science High School?!
Maitanong lang din natin, may naitayo na bang maipagmamalaking libreng public hospital ang mga Tolentino sa Tagaytay?!
Sana naman ‘e may maisagot ang mga Tolentino sa tanong na ito — kahit alang-alang lang sa kandidatura ni Francis.
Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
