HATAW! D'yaryo ng Bayan hatawtabloid.com
KAKAIBANG Paolo Contis ang mapapanood sa pelikulang Angela Markado na pinagbibidahan ni Andi Eigenmann. Ito ay remake ng pelikulang unang pinagbidahan ni Hilda Koronel at pinamahalalan ni Direk Lino Brocka noong 1980. Serialized din ito sa komiks na sinulat ni Direk Carlo J. Caparas. Sa remake nito ay si Direk Carlo na ang direktor ng naturang pelikula na mula sa Oro de Siete Films.
Isa si Paolo sa limang rapist dito ni Andi. Kasama sa nag-gang rape sa kanya sina Jeffrey Quizon, Polo Ravales, Felix Roco, at CJ Caparas. Sa Bubble Gang ay pakuwelang komedyante si Paolo at dito ay bad boy na rapist, hindi ba siya nag-alala na manibago ang audience sa ipinakita niya sa pelikulang ito?
“Actually ay okay nga e. Kasi ang Bubble Gang is actually a show na napapakita ko na hindi ako totoong ganoon, ‘di ba?
“So breaker ito, masaya ako na ganito, na nagagawa ko ang iba-ibang klaseng proyekto. Na nabibigyan ako ng mga ganitong opportunity para alam ng mga tao na hindi lang tayo puro comedy,” nakangiting esplika ng Kapuso actor.
Inisip mo ba na parang manyakis ka habang ginagampanan iyong role mo rito?
“Actually, iba-iba kasi iyong characters namin dito, e. Ako kasi, sadista ako, e. May ibang rape na manyak ang pagka-rape niya. Ako kasi, sadista rito. Ang tema ng rape ko ay yung nananakit. So, iba yung sa akin, it’s not lust, more on sadist talaga ako rito.”
Ano ang masasabi niya sa acting dito ni Andi? “Magaling siya, ibinigay niya lahat e… walang arte-arte, ibinigay niya lahat ng kailangan for the movie.
“Masasabi ko na nag-work iyong film, kasi lahat naman kami ginawa namin iyong trabaho namin.”
Kinuha rin namin ang reaction niya sa sinabi ni Direk Carlo na mas magagaling ang rapist sa remake ng pelikulang ito.
“Ginawa lang namin ang hiningi ni Direk. Nang tinanggap naman namin ang movie, alam namin ang gagawin namin… So, ginawa lang namin ang hinihingi ni Direk.”
Kabilang din sa cast sina Bembol Roco, Bret Jackson, Ana Roces, Marita Zobel, Buboy Villar, Mika dela Cruz, PAO chief Persida Acosta, at iba pa. Showing na ito sa December 2.
ALAM MO NA! – Nonie V. Nicasio
