Derek, tinanggihan si Claudine sa TV5 serye

TIYAK na malulungkot ang fans ni Claudine Barretto dahil hindi ito sa ABS-CBN gagawa ng teleserye kundi sa TV5.

Kung hindi magbabago ang plano ay sa Nobyembre 16, Lunes may meeting si Claudine sa TV5 kasama ang manager niyang si boss Vic del Rosario na siya ring magpo-produce ng programa niya bilang bagong content provider ng nasabing TV network.

Wala naman daw kasing offer ang ABS-CBN na serye kay Claudine kaya siguro habang sariwa pa sa tao ang success ng Etiquette For A Mistresses na nagmarka ang aktres sa papel nitong si Chloe Zamora ay sasamantalahin ng Viva na bigyan siya ng teleserye

Nabanggit din sa amin ng aming source na si Derek Ramsay ang gusto ni boss Vic na leading man ni Claudine pero mukhang busy ang aktor dahil tinanggihan niya ito.

As of now ay wala pang napipiling leading man si Claudine dahil pawang mga bagets aktor ang nasa TV5.

FACT SHEET – Reggee Bonoan