Estriktong manager tinodas ng jaguar

CAGAYAN DE ORO CITY – Ang mahigpit na pagpapatupad ng mga polisiya sa trabaho ang dahilan ng pagpatay ng isang security guard sa manager ng wood furniture shop sa Brgy. Kauswagan, Cagayan de Oro City kamakalawa.

Kinilala ang biktimang si Luwalhati Yap, 45-anyos, single parent, tubong Cebu, naninirahan sa Lungsod ng Dumaguete.

Sa ulat ni PO3 Leonilo Laquio ng Carmen Police Station, sinita ng biktima ang security guard na si Grover Mark Gomez dahil laging natutulog kapag nasa duty.

Pagkaraan ay narinig ng suspek na siya ang pinag-uusapan ng biktima at immediate supervisor kaya humantong sa kanilang mainitang pagtatalo.

Base sa initial findings ni medico legal officer Dr. Christian Caballes ng Scene of the Crime Operatives (SOCO), hinampas nang matigas na bagay ang ulo ng biktima at may malubhang saksak sa likod na naging dahilan ng agaran niyang pagkamatay.

Si Yap ay halos isang taon na bilang manager ng Giardini Del Sole Furniture Shop habang ang suspek ay mag-iisang linggo pa lamang naka-duty, mula sa Cherubim Security Agency.

Patuloy ang pursuit operation ng pulisya upang maaresto ang tumakas na suspek na residente sa Brgy. Kauswagan ngunit nakalabas na ng bisinidad ng Cagayan de Oro City at nakarating na sa probinsya ng Misamis Occidental.