5-M fake dollar bills nakompiska sa Negros (2 tiklo)

BACOLOD CITY – Agad sinampahan ng kasong illegal possession of false treasury bank note ang dalawang magsasaka na nahuling nagpapakalat ng pekeng US dollar bills sa Negros Occidental kamakalawa.

Ayon kay Supt. Levy Pangue, hepe ng Bacolod Police Investigation and Detection Management Unit, umabot sa $5 milyon ang halaga nang nakompiskang fake US dollar bills sa entrapment operation ng Investigation and Detective Management Unit (IDMU), Mobile Patrol Group, City Intelligence Unit at Police Station-8 ng Bacolod City Police Office (BCPO).

Ang mga sinampahan ng kaso ay kilalang sina Erwin Sicano, 31, at Frelie Toledano, 31, kapwa mga residente ng bayan ng Murcia, Negros Occidental.

Ayon kay Pangue, nakompiska mula sa dalawang suspek ang limang bundles ng $10,000 fake US bills at isang $100,000 pekeng pera.

Aniya, isang pastor ng simbahan na kasama ng mga nahuling suspek ang inaresto rin ng mga awtoridad ngunit kalaunan ay pinalaya rin.

Sa ngayon, payo ng awtoridad sa publiko na mag-ingat sa paglaganap ng mga pekeng pera sa Negros lalong-lalo sa pagsapit ng  Disyembre.