2 dalagita hinalay nina kuya at tatay

IMBES proteksiyonan at arugain, mismong ang kanilang kuya at ama ang sumira sa kinabukasan ng dalawang dalagita na paulit-ulit na ginahasa sa kanilang barong-barong sa Area H, Gate 52, Parola Compound, Binondo, Maynila.

Kasama ang kanilang ina, inireklamo sa barangay hall ni Sam, 13, Grade 4 pupil; at Janna, 10, Grade 3 pupil, ang kanilang ama na si Paquito Abrigo, 43; at kuya na si Joel, 15, grade 7 pupil, na agad inaresto dakong 4 p.m. kamakalawa sa kanilang bahay.

Dinala na ng mga barangay tanod ang mag-ama sa Women and Children Protection Unit ng Manila Police District-Police Station 11 at pormal nang kinasuhan.

Ayon kay Jenny, 42, ina ng mga biktima, ipinagtapat ng kanyang mga anak na nitong Setyembre sila sinimulang halayin ng kanilang kuya at ama.

Nagkaroon lamang aniya ng lakas ng loob si Sam na ipagtapat sa ina ang nangyari bunsod ng payo ng kaibigan na pinagsumbungan ng dalagita.

“Tatlong beses na po akong ginahasa ni Papa, tinatakot po niya ako kaya hindi ako agad nakapagsumbong sa mama ko,” ayon kay Sam.

“Si Papa, isang beses lang ako ginalaw, si Kuya madami, paulit-ulit,” pahayag ni Janna.

Sa panig ni Joel, sinabi niyang natukso siyang galawin ang mga kapatid nang maengganyo siyang gayahin ang napapanood sa YouTube.