HATAW! D'yaryo ng Bayan hatawtabloid.com
SA ginanap na presscon ng Majasty Concert ni Maja Salvador na gaganapin sa SM Mall of Asia Arena sa Nobyembre 13 produced ng Jerica M. Aguilar Events Management at Pink Management Productions, Inc, ay inamin niyang marami siyang bashers noong kasagsagan ng isyu nila nina Gerald Anderson at Kim Chiu.
Natanong kasi ang aktres kung maraming nag-bash sa kanya noon, ”oo sobrang dami tulad na malandi, maharot, mistress, homewrecker, makiri, at kung ano-ano pa. Nakasama mo lang halimbawa (aktor), kung ano-anong tawag na, so deadma na lang.”
Kaya ngayong 2015 ay sobra-sobrang blessings naman daw ang nararanasan niya at higit sa lahat, naka-move on na siya kaya naman abot-abot ang pasalamat niya sa magandang kapalit na nangyari sa kanya noong 2013.
Inamin din ni Maja na sobrang challenge sa kanya na mag-show sa Mall of Asia Arena dahil sobrang laki nito at dahil sa maraming sumusuporta sa kanya ay kailangan kayanin niyang mapuno ito sa tulong ng mga kaibigan sa showbiz.
Ang special guests ni Maja sa Majasty concert ay sina Paulo Avelino, Kakai Bautista, Rayver Cruz, Enchong Dee, JC de Vera, Enrique Gil, at Piolo Pascual na talagang hiniling niya at napagbigyan naman siya.
Siyempre tinanong naman ang leading man niyang si Coco Martin sa Ang Probinsiyano kung bakit wala sa line-up ng guests?
“Kasi po taping day ng ‘Ang Probinsiyano’ ‘yung araw ng concert ko, pero malay natin, baka i-surprise niya ako,” nakatawang sabi ng aktres.
Samantala, naikuwento namin kay Maja na dream ni direk Antoinette Jadaone na makatrabaho sila ni Paulo dahil nakitaan sila ng kilig sa seryeng Bridges of Lovebukod kina Piolo at Judy Ann Santos sa Don’t Give Up On Us movie.
“Ah talaga? Puwede ko na bang sabihin (nagpaalam sa handler), actually, ‘yung ‘That Thing Called Tadhana’ ay in-offer talaga sa akin iyon, pero since busy ako noon hindi ko tinanggap. Tapos noong nagkita kami ni Paulo, sabi niya sa akin, ‘sayang, hindi mo tinanggap ‘yung ‘Tadhana’, magkasama sana tayo roon,’ kaya roon ko lang nalaman na si Pau pala ang leading man ko dapat,” kuwento ng aktres.
Kung gayon, hindi pala sina JM de Guzman at Angelica Panganiban ang original choice? Good thing kumita ang Tadhana at ito ang naging daan para makabalik ang actor sa showbiz.
Isa pang pasalamat ni Maja ay talagang sobrang suportado siya ng Sisters Sanitary Napkins at Pantyliners, Petit Monde, at Krem Top Coffee Creamer.
FACT SHEET – Reggee Bonoan
