Lampaso sa Senado si Win Gatchalian

KAHIT walang kapana-panalo si Valenzuela City Rep. Win Gatchalian, buong tapang pa rin na naghain ng kanyang certificate of candidacy (COC) bilang kandidatong senador ng Nationalist People’s Coalition.

Hindi natin alam kung ano ang pumasok sa kukote nitong si Gatchalian at pinagpipilitan niyang tumakbong senador kahit alam naman siguro niyang hindi siya mananalo sa darating na 2016 elections.

Sa pinakahuling  survey ng SWS, nakakuha lamang  ng 10 percent si Gatchalian, at nasa pang 24 na puwesto sa kabuuang 44 na kandidatong senador na pinagpilian. Napakalayo ni Gatchalian sa mga kandidatong pumasok sa “Magic 12.”

Sabi pa ni Gatchalian, isa raw sa kanyang Senate legislative agenda ay may kaugnayan sa mababang pasahod. Kung ganoon, e, bakit hindi niya unahin ang Valenzuela City na napakaraming pabrika ang hindi sumusunod sa panuntunan ng batas paggawa.

Maraming manggagawa sa Valenzuela City ang patuloy na pinagsasamantalahan ng mga kapitalista tulad nang hindi pagbibigay ng tamang pasahod. Karamihan sa mga manggagawa rito ay hindi regular kundi pawang mga casual, pakyawan at kontraktuwal na pawang walang benepis-yong tinatanggap.

Ang mabuting gawin ni Gatchalian, unahin niyang sugpuin ang talamak na droga, sugal at prostitusyon sa Valenzuela City.  Walang puwang sa Senado si Gatchalian.