Sariling pagbabago tunay na daan sa kaunlaran—Alunan

MALAKI ang paniniwala ni dating Interior and Local Government secretary Rafael Alunan III na ang pagbabago sa sarili ng bawat Filipino ang magsisilbing tunay na daan upang makamit ng bansa ang tunay na kaunlaran.

Sa panayam ng Radyo Bombo Dagupan, iginiit ni Alunan ang kahalagahan ng leksiyon na ipinamalas ng bayani at rebolusyonaryong si Heneral Antonio Luna sa pelikula hinggil sa kadakilaan na umani ng positibong pagtanggap mula sa iba’t ibang sektor ng lipunan.

“Sa pelikulang Heneral Luna, iyong binitiwang salita ni Luna sa Gabinete ni Presidente Aguinaldo na ‘Ang kalaban ng mga Filipino ay hindi ang mga dayuhan kundi ang ating sarili,’ ganoon din ang nangyari sa panahon namin na nauwi sa diktadurya,” ani Alunan.

“Napakagulo ng mga Filipino kaya napilitan si Presidente Marcos na magdeklara ng Martial Law upang maibalik ang disiplina. Kaya lang sa panahon ng diktadurya, naabuso naman ang sambayanang Filipino.”

Idiniin ni Alunan na walang naganap na pagbabago kahit pa napatalsik sa puwesto si Marcos ng People Power o EDSA Revolution noong 1986.

“Makalipas ang maraming taon, napilitan ang mga Filipino na labanan ang dictatorship. Pero bakit ganoon pa rin? Dahil napakahina ng ating lipunan. Ang kalaban natin noon ay ating mga sarili. Kung pabibilisin natin ang oras upang sumapit sa panahon ngayon, ganoon na naman. Lumalabas na naman ang kahinaan ng ating lipunan dahil sa ating kultura na pabaya,” ani Alunan.

“Tapos inuuna natin ang sarili bago ang mas malaking interes para sa kabutihan ng bayan. Kaya ‘yong sine na iyon, ang binitawang salita ni Heneral Luna ay napakahalaga pa rin hanggang ngayon,” dagdag ni Alunan. “Ang problema ay hindi komunismo, hindi imperyalismo, hindi pasismo. Ang tunay na problema ay tayo mismo.”