HATAW! D'yaryo ng Bayan hatawtabloid.com
ISANG exhibition game ang nakatakdang gawin sa Biyernes, Oktubre 9 sa Cuneta Astrodome simula alas-siyete ng gabi upang makalikom ng pera para sa pagpapaospital ng dating PBA superstar na si Samboy Lim.
Maghaharap ang Grand Slam Team na binubuo ng 1996 Grand Slam Alaska Aces at ang 2014 Grand Slam champions Purefoods Star Hotshots kalaban ang mga dati at kasalukuyang superstars ng Barangay Ginebra San Miguel.
Makakasama sa Grand Slam Team sina Jojo Lastimosa, Johnny Abarrientos, Rene “Bong” Hawkins, Edward Juinio, Alvin Patrimonio, James Yap, Marc Pingris, Peter June Simon, Mark Barroca, Alex Mallari, Rafi Reavis at Justin Melton.
Ang Ginebra team naman ay bubuuin nina Marlou Aquino, Allan Caidic, Noli Locsin, Vince Hizon, EJ Feihl, Mark Caguioa, Jayjay Helterbrand, LA Tenorio, Japeth Aguilar, Greg Slaughter, Chris Ellis, Sol Mercado at Joe Devance na dating manlalaro ng Star.
Mabibili na ang mga ticket sa Ticketnet sa ticket booth ng Smart Araneta Coliseum.
Samantala, inanunsiyo ng ilang mga alumni ng Letran na ang mga kikitaing tiket sa laro ng San Beda at Letran sa NCAA mamaya sa San Juan Arena ay para rin sa pagbayad ng pagpapagamot kay Lim na naglaro sa Knights noong 1982 hanggang 1985. (James Ty III)
