Suspected bomber sa Saudi inaalam pa kung Pinay

INILINAW ng Department of Foreign Affairs (DFA) na hindi pa maaaring masabi na Filipina talaga ang naarestong kasama ng isang Syrian kaugnay sa terror plot sa Saudi Arabia.

Wika ni DFA spokesman Asec. Charles Jose, lumabas lang sa mga report na Filipina ang nahuling babae ngunit hindi pa personal na nakakausap ng mga opisyal ng embahada ng Filipinas ang nabanggit na suspected bomber.

Lumabas kasi ang report sa Saudi Gazette, bagay na kinuha naman ng iba pang mga ahensiya, kasama na ang local media sa Filipinas.

Kung sakaling matitiyak na Filipina nga ang naarestong kasama ng terorista o kaya ay matutuklasang biktima lamang siya ng sitwasyon, agad aniyang magbibigay ng tulong ang DFA.

Lumabas din sa ilang impormasyon na pinuwersa ng Syrian ang Filipina na sumama sa kanyang mga plano, makaraang tumakas ang OFW mula sa kanyang employer noong nakaraang taon dahil sa hindi pa mabatid na rason.