HATAW! D'yaryo ng Bayan hatawtabloid.com
PATULOY ang gumagandang laro ng pambato ng University of Santo Tomas na si Kevin Ferrer ngayong UAAP Season 78.
Noong Miyerkoles ay nagpasiklab si Ferrer nang dalhin niya ang Growling Tigers sa 77-61 na panalo kontra De La Salle University sa Mall of Asia Arena.
Nagtala si Ferrer ng 27 puntos para pangunahan ang rally ng UST mula sa 16 puntos na kalamangan ng Green Archers sa ikalawang quarter at makuha ang ika-limang panalo kontra sa isang talo katabla ang Far Eastern University sa liderato.
Dahil dito ay napili ng UAAP Press Corps si Ferrer bilang Player of the Week.
“Sobrang saya ko kasi nagse-step up na yung mga kapatid ko,” wika ni Ferrer. “Unang una pa lang, sabi ko sa kanila na kailangang lahat tayo mag-step up, lalo na sa defense kasi yun talaga ang magpapanalo sa amin. Nangyari na nga yung situation kaya masayang masaya kami.”
Umaasa si UST coach Bong de la Cruz na magpapatuloy ang magandang laro ni Ferrer sa susunod na laro ng Tigers bukas kontra University of the East sa pagtatapos ng first round ng eliminations ng UAAP sa Smart Araneta Coliseum.
“Hindi lang kami team, kundi pamilya pa,” ani De la Cruz. Yun ang ginagawa namin at pinapairal ngayon. And with Kevin, maganda yung pinapakita nyang example sa mga teammates niya.
(James Ty III)
