Ex-Gov. Valera guilty sa Bersamin killing

HINATULAN ng reclusion perpetua o habambuhay na pagkabilanggo ng mababang hukuman si dating Abra Governor Vicente Valera kaugnay sa kaso ng   pagpaslang  kay  dating  Congressman Luis Bersamin noong 2006.

Sinabi ni Atty. Persida Rueda Acosta, pinuno ng Public Attorney’s Office, at counsel ng mga state witness sa krimen, napatunayan ni Judge Roslyn Tria ng Quezon City Regional Trial Court Branch 94, na guilty ang dating gobernador sa krimen.

Bukod kay Valera, kasama rin sa hinatulan ng reclusion perpetua para sa dalawang bilang ng kasong murder, sina Rufino Panday at Leo Bello.

Sa naturang insidente, napatay rin ang police escort ng kongresista na si SPO1 Adolfo Ortega, habang sugatan ang driver ng lawmaker na si Allan Sawadan.

Para sa kasong frustrated murder dahil sa pagkakasugat ni Sawadan, si Valera at dalawa pang akusado ay pinatawan ng 12 taon pagkabilanggo.

Si dating Congressman Bersamin ay pinatay ng sinasabing hired killers sa harap ng Mount Carmel Church sa New Manila, Quezon City noong Disyembre 16, 2006.