Tulak arestado, 29 sachet ng shabu kompiskado

LAOAG CITY – Nakompiska ng mga pulis sa lungsod ng Laoag ang 29 sachet ng shabu sa isinagawa nilang search operation sa isang bahay sa Brgy. 9 ng nasabing lungsod kamakalawa.

Kinilala ang may-ari ng bahay at subject ng operasyon na si Warren Agpaoa, may asawa, at residente sa naturang barangay.

Ayon kay Senior Insp. Danilo Pola ng PNP Laoag, bukod sa 29 sachet ng shabu, nakompiska rin sa loob ng bahay ng suspek ang isang kalibre .45 baril, 22 bala ng 9mm, at 33 bala ng kalibre .45.

Habang pinabulaanan ni Agpaoa na sa kanya ang mga nakompiskang droga sa loob ng kuwarto ng kanyang anak ngunit inamin niya na matagal na siyang gumagamit ng ipinagbabawal na gamot.

Samantala, kinompirma ng asawa ng suspek na alam niya ang ilegal na aktibidad ng kanyang asawa at madalas din niyang pinagsasabihan na itigil na.

Aniya, tuwing tumitigil ang kanyang asawa sa pagtutulak ng droga ay muling hinihimok ang suspek ng kanyang mga pinsan.

Ang nakompiskang hinihinalang shabu ay hindi pa napulbos at kasinglaki pa ng mga butil ng mais at balatong.

Hindi pa matukoy ng PNP Laoag ang halaga ng mga nakompiskang droga.