‘Jenny’ signal no. 1 sa Batanes

ITINAAS na ang Batanes group of islands sa signal number one habang lumalayo ang Bagyong “Jenny” sa bansa, ayon sa weather bureau PAGASA kahapon.

Sinabi ni PAGASA weather forecaster Manny Mendoza, bahagyang lumakas ang bagyo, taglay ang lakas ng hangin na 160 kilometers per hour (kph) malapit sa sentro at pagbusong aabot sa 195 kph.

Huling namataan ag bagyo sa layong 645 kilometro silangan-hilagang silangan ng Itbayat, Batanes. Kumikilos ito pa kanluran-hilagang kanluran sa bilis na 15 kilometro kada oras.

Itinaas ang public storm signal sa Batanes upang maihanda ang mga residente sa epekto ng bagyo na mararamdaman sa loob ng 36 oras, banggit ni Mendoza.

Patuloy na pinalalakas ni Jenny ang southwest monsoon o habagat na naka-aapekto sa Katimugang Luzon at Visayas.

Mararanasan ang maulap na papawiring may mahinang pag-ulan at pulo-pulong pagkidlat at pagkulog sa Metro Manila at nalalabing bahagi ng Luzon at Kanlurang Visayas.

Bahagyang maulap hanggang maulap na kalangitang may isolated thunderstorms ang iiral sa natitirang bahagi ng bansa.

Pinapayuhan ang mga mangingisda na huwag pumalaot sa silangang baybaying-dagat ng Luzon at Visayas gayondin sa hilagang seaboards ng Calaguas.

Inaasahang hindi magla-landfall si Jenny na tinatayang makalalabas ng Philippine area of responsibility (PAR) sa Martes ng hapon.