Anak ni Jawo kinasuhan na

 KASONG attempted murder, direct assault at illegal possession of fire arms and ammunition ang isinampa ng pulisya sa Makati City Prosecutors Office laban sa anak ni basketball living legend at dating Senador Robert Jaworski at sa driver na nakipagbarilan sa mga pulis at nahulihan ng mga armas at bala nitong Sabado, Setyembre 19, ng madaling araw sa nasabing lungsod.

Kamakalawa dakong 5:30 p.m. isailalim sa inquest proceeding si Ryan Joseph Jaworski, 40, at driver niyang si Joselito Au, 52, makaraang  sampahan ng mga  kaso sa piskalya.

Isasailalim din ng pulisya sa paraffin test ang mga suspek.

Habang patungo ang follow-up operation ang awtoridad laban sa kasamahan nilang si Ferdinand Paragon na nakatakas.

Samantala, hiniling ng pamilya ni Ryan Joseph na sa National Bureau of Investigation (NBI) siya magpasailalim ng paraffin test.

Kasalukuyan pa ring nakaratay  si Ryan Joseph sa Makati Medical Center  (MMC) na mahigpit na binabantayan ng mga awtoridad.

Una nang inihayag ng pulisya, target rin nilang buwagin ang sinasabing gun running syndicate ng mga suspek.

Naaresto ang dalawa at nakompiskahan ng mga bala at baril sa panulukan ng Chino Roces Avenue at Pasay Road, Brgy. Pio Del Pilar, Makati City makaraang makipagbarilan sa mga tauhan ng National Capital Regional Police Office (NCRPO) nang magsagawa ng gun running buy bust operation nitong Sabado ng madaling araw.