Market holiday vs privatization ratsada na sa Maynila

NAGSIMULA na ang “Market Holiday” ng mga tindero sa iba’t ibang palengke sa Maynila nitong Lunes.

Kabilang sa nakilahok ang mga tindero sa mga palengke sa Pritil, Sampaloc, Trabajo, Quinta, Dagonoy, San Andres at Sta Ana.

Layon ng Market Holiday na kontrahin ang pagsasapribado ng mga pampublikong palengke sa Maynila.

Nakapaloob ito sa Ordinansa Bilang 8346 na pumapayag sa joint ventures ng Maynila at mga pribadong kompanya.

Pinirmahan ito ni Mayor Joseph “Erap” Estrada noong May 13, 2014.

Aabot sa 17 pampublikong palengke ng Maynila ang nakatakdang maisapribado, bagay na kinokontra ng grupong SAMPAL (Save Manila Public Market Alliance).

Idiniin ng grupo na hindi sila tutol sa pagbabago ngunit umapela silang huwag isapribado ang kanilang puwesto sa palengke dahil tiyak na tataas ang renta nila sa mga ito.