Karylle, imposibleng makagawa ng serye dahil sa Showtime

AYAW magbigay ng detalye ni Karylle T. Yuzon kung bakit umalis na siya sa long time manager niyang si Carlo Orosa ng Stages at lumipat na siya kay Arnold L. Vegafria.

Nakita namin ang seksi at magandang misis ni Yael Yuzon sa birthday party ni Mother Lily Monteverde na katabi si ALV (Arnold) at tsika-tsika kaya natanong namin kung lumipat na siya at umoo naman.

“Huwag na Regg, baka isulat mo, eh,” tumatawang sabi sa amin ni Karylle nang kulitin namin ang dahilan ng paglipat niya.

Kaya ang tinanong na lang namin ay kung totoong apektado ang It’s Showtime sa Aldub ng Eat Bulaga.

Natatawang ikunuwento ni Karylly ang blooper niya dahil napagkamalan niyang dati na niyang kakilala si Yaya Dub na rati niyang bandmate.

“Akala ko kasama ko siya rati sa isang banda, ‘yun pala kamukha lang niya kasi ganoon din ang face niya (nagpapatawa), akala ko kaya ko nakikita sa feed ko, akala ko friend ko si Monica, hindi pala,” kuwento ng TV host.

At inulit namin ang tanong kung affected ba ang Showtime, “hindi naman, masaya nga, eh, hindi naman nag-emergency meeting, madalas kaming nagmi-meeting, nagla-lunch ganyan.

“Actually, marami namang inilalabas na new segments ‘di ba, kaya masaya at saka para maraming new, kung ano ‘yung type ng mga tao, ‘yun talaga ang (gagawin).”

Nabanggit din ni Karylle na pasok na sa show nila ang kapatid niyang si Zia Quizon.

Samantala, magre-renew si Karylle ng kontrata niya sa ABS-CBN at tinanong namin kung gusto niyang magkaroon ng soap drama.

“Parang mahirap kasi may ‘Showtime’ ako na araw-araw, so parang hindi ako puwede, minsan nga may shows (out of town), hindi napapayagan so, mahirap,” katwiran ni Karylle.

At sinabi namin na kapag super-pagod na siya ay hindi sila makakabuo ni Yael ng baby, “ganoon?  Pero siyempre, masaya ako kasi nakapag- concert kami ni Yael sa Qatar, sa Abu Dhabi tapos pag-uwi, may show kami ni mama (Zsa-Zsa Padilla) at ‘yung ‘Next Attraction’ na maganda ang feedback.

“Next step ay gagawa ako ng album, kagabi, gumagawa kami ng kanta, sabi kasi niya (Yael), ang bagal ko raw gumawa ng album ko,” saad ni K (palayaw ng TV host).

FACT SHEET – Reggee Bonoan