HATAW! D'yaryo ng Bayan hatawtabloid.com
MAGSISIMULA na sa Sabado, Agosto 15, ang single-round quarterfinals ng Shakey’s V League Season 12 Collegiate Conference sa The Arena sa San Juan.
Nanguna ang back-to-back UAAP champion Ateneo sa mga koponang pumasok sa quarters pagkatapos na walisin nito ang lahat ng mga kalaban sa Group B na may limang sunod na panalo.
Kasali rin sa quarters ang University of Santo Tomas, Arellano University, Far Eastern University, National University, University of the Philippines, College of St. Benilde at La Salle-Dasmarinas.
Tinapos ng Tigresses, Lady Chiefs, Lady Bulldogs at Lady Tamaraws ang elims na parehong may apat na panalo at isang talo habang naiposte ng Lady Maroons ng 3-2 na kartada.
Nakuha ng Lady Patriots ang huling silya sa quarters pagkatapos na talunin nila ang Lady Blazers, 25-19, 25-21, 15-25, 18-25, 16-14, sa huling laro ng elims noong Linggo ng gabi.
“I just told the girls, just enjoy the game pero kailangang gumawa kami ng tama,” wika ng head coach ng La Salle Dasma na si Raymond Ramirez.
Parehong tabla ang DLSU-D at Benilde sa kanilang 2-3 na panalo-talo.
Maagang nagbakasyon ang San Sebastian College, Technological Institute of the Philippines, University of Batangas at Polytechnic University of the Philippines.
Sa Sabado ay maglalaban ang La Salle Dasmarinas at NU sa alas-12:45 ng tanghali at UP kalaban ang Ateneo sa alas-tres habang sa Linggo ay maghaharap ang FEU at St. Benilde sa alas-12:45 ng tanghali at UST kontra Arellano sa alas-tres.
Ang Shakey’s V League Season 12 ay handog ng PLDT Home Ultera at napapanood ang mga laro nang live sa GMA News TV 11.
(James Ty III)
