Investment scam kaya bang sugpuin?

MARAMING Pinoy ang  patuloy pa ring naeengganyo na kumita sa pamamagitan ng “easy money.” 

Ito ‘yung maglalagak nang malaking halaga ng pera sa paniwala na madaling tutubo kahit walang ginagawang pagbabanat ng buto dahil ang pera na mismo ang kikilos para sa paglago nito.

Kaya nga hanggang ngayon marami pa rin ang mga naloloko ng mga investment scam mula sa multi-bilyong pisong Aman Futures doon sa Mindanao hanggang dito sa multi-bilyon ding One Dream Global Marketing Inc.

Nitong mga nakaraang araw, 18 katao mula sa Batangas ang nagsampa ng reklamong syndicated estafa dahil sa umano’y panggagantso sa kanila ng mga may-ari at opisyal ng One Dream nang mahigit sa P3.3 bilyon.   

Marami sa kanila ang nag-invest ng halagang hindi bababa sa P100,000 hanggang P15 milyon. Madali silang napaniwala na kikita ang kanilang pera sa loob lamang ng ilang araw.  

Matapos magtiwala at umasa na mabilis silang yayaman, nauwi sa wala ang kanilang perang pinagbuwisan ng dugo at pawis.

Marami pa rin tayong mga kababayan na hanggang ngayon ay hindi pa rin nadadala sa mga ganitong uri ng panloloko.  Malinaw na repleksyon lang ito ng paghahangad na kumita ng pera sa madaling paraan.

O, repleksyon din kaya ito ng isang pagiging gahaman?