HATAW! D'yaryo ng Bayan hatawtabloid.com
ISA si Mon Confiado sa pinaka-abalang aktor sa bansa. Lagi na’y kaliwa’t kanan ang pelikulang ginagawa niya. Sa katatapos na 1st Sinag Maynila Film Festival, isa siya sa bida sa pelikulang Swap.
“Ako yung police agent sa movie na nagso-solve ng kaso ng kidnapping,” saad sa amin ni Mon nang makahuntahan namin siya sa Facebook last week.
Kasali rin siya sa pelikulang Heneral Luna na tinatampukan ni John Arcilla. Gaganap dito si Mon bilang si Emilio Aguinaldo. Mapapanood din si Mon sa pelikulang Mandirigma ni Direk Arlyn dela Cruz na tinatampukan ni Luis Alandy.
Incidentally, dahil birthday ni Mon nang maka-chat namin siya, tinanong din namin kung ano ang kanyang birthday wish.
“Ang birthday wish ko ay good health… At sana more International films. Kasi ay part ako ng movie na Showdown in Manila. Ang role ko rito, ako yung gangster na makakalaban ng bida sa movie na ito,” esplika pa niya hinggil sa pelikulang pinagbibidahan ng Hollywood star na si Mark Dacascos.
Kasali rin sa pelikulang ito sina Tia Carrrere, Casper Van Dien, Don “The Dragon” Wilson, Olivier Gruner, Cynthia Rothrock, Matthias Hues, Cary Hiroyuki-Tagawa, at Iza Calzado.
Isa si Mon sa pinaka-versatile na actor sa industriya. Higit 300 na ang nagawa niyang pelikula at para sa kanya, mallit man o malaki ang role na natotoka sa kanya, lagi niyang ibinibigay ang 100 percent ng kakayahan niya sa pag-arte.
Happy birthday ulit Mon!
ni Nonie V. Nicasio
