HATAW! D'yaryo ng Bayan hatawtabloid.com
MASASABING kung anomang tampuhan ang namagitan kina Coco Martin at Nora Aunor, ito ay natuldukan na sa awards night ng 13th Gawad Tanglaw.
Kapwa nandoon sa naturang event sina Coco at Nora bilang awardee. Si Coco bilang Best Actor para sa TV series na Ikaw Lamang. Samantalang ang Superstar ang Best Actress naman para sa pelikulang Dementia.
Si Coco ang gumawa ng first move at lumapit sa Superstar upang batiin ito.
Matatandaan na napabalitang nagkaroon sila ng gap noon habang ginagawa ang pelikulang Padre de Familia na isa sa producer si Coco.
Sinabi ni Coco na natuwa siya sa pangyayari na nagkita at nagyakap sila ni Nora.
“Hindi ko po makakalimutan ang pakikipagtrabaho sa kanya. Napakasaya po namin sa set, napaka-maalaga niya. Masaya siyang kasama, marami kaming natututunan.
“Ang ‘di ko maintindihan, may mga tao na nagsasalita ng hindi maganda na nakaka-apekto sa magandang samahan. Pero ngayon po maayos na kami,” saad pa ng aktor.
Sa parte naman ng premyadong aktres, nagpahiwatig siya ng kagalakan sa nangyari. “Iyong pakiramdam na umalis ang anak mo at matagal mong hindi nakita. Tapos bumalik sa iyo matapos ang matagal na panahon. Ganoon po ang nararamdaman ko.”
Inengganyo rin niya si Coco na patuloy ma mag-produce ng pelikula. “Sana ituloy-tuloy niya ang pagpo-produce ng magagandang mga pelikula at malaki rin ang respeto ko sa kanya bilang artista. Naramdaman ko na malaki ang pagmamahal niya sa trabahong ito.”
ni Nonie V. Nicasio
