HATAW! D'yaryo ng Bayan hatawtabloid.com
FIRST choice ni Direk Chito Rono si Sylvia Sanchez na gumanap bilang lesbian mother ni John Lloyd Cruz sa pelikulang The Trial dahil nakitaan daw siya ng direktor na siga-siga maglakad at kumilos.
Sabagay, kapag off-cam ay hindi ladylike kumilos ang nanay ni Arjo Atayde, parang one of the boys, sobrang mabilis at maliksi lalo na kapag naglalakad kayo, ang lalaki ng hakbang.
Anyway, kuwento ni Ibyang ay tinanong daw niya si direk Chito kung bakit siya ang napiling gumanap na tomboy sa The Trial.
“Sabi niya, ‘noong panahon daw namin, noong sexy star pa raw ako, sa mga kahilera ko that time, ako raw ang parang tomboy maglakad. Boyish kumbaga kaya noong mabasa niya ang script at nakita niya ang character ng tomboy-mother ni John Lloyd, ako kaagad ang naisip niya,” say ni Ibyang sa amin.
Nagbiro pa nga Ateng Maricris, ”buti na lang hindi ako natuluyang maging tomboy, kung hindi wala akong magagandang mga anak ngayon.”
Hindi nakadalo sa presscon ng The Trial si Sylvia dahil nasa Europe sila ng asawang si Art Atayde na isinama siya para sa meeting kasama ang mga naka-negosyo at the same time ay ‘honeymoon’ na rin nila dahil ilang taon na rin namang busy ang aktres sa Be Careful With My Heart.
Hindi na raw sila masyadong nagkakasamang dalawa lang dahil kapag nasa bahay siya ay siyempre priority niya ang mga anak nila ni Papa Art.
Kuwento nga ni Sylvia, ”tinapos ko lang ang shoot namin ng ‘The Trial’. Ang ganda ng movie, sobra. Nakakaiyak! Advise ko nga sa mga manonood, huwag panyo o tissue paper ang dalhin ninyo ‘pag nanood kayo, tuwalya dapat dahil hahagulgol kayo sa maraming eksena.”
Pero bago naman mag-premiere night ay nakarating na ng Pilipinas sina Ibyang at Papa Art dahil dadalo siya sa premiere night ng The Trial dahil gusto niyang mapanood ito sa unang gabi palang at uulitin niya sa opening day sa Oktubre 15 mula sa Star Cinema.
At tinanong namin kung escort ba ni Ibyang si Papa Art, ”naku hindi, hindi naman ‘yan (Art) sumasama sa showbiz events ko, ayaw niya. Kaya si Vince de Jesus na asawa kong bakla sa pelikula ang escort ko.”
Samantala, malapit na ring magtapos ang Be Careful With My Heart pero hindi naman totally mawawala sa telebisyon si Ibyang dahil may mangilan-ngilang eksena siya sa Pure Love bilang nanay ni Raymund (Arjo Atayde) na naka-confine sa mental hospital.
“Sayang nga, taping ako ng ‘Pure Love’, eh, ito naman ‘yung araw na paalis kami, so hindi na nakunan. Hindi ko alam ano gagawin,” sabi pa ni Ibyang.
ni Reggee Bonoan
