Sylvia, tinalo pa ang tunay na lalaki sa pagiging tomboy

ni Reggee Bonoan

FOLLOW-UP ito sa nasulat namin dito sa Hataw noong isang araw tungkol sa bagong imahe ni Sylvia Sanchez sa pelikulang The Trial kasama sina Richard Gomez, Gretchen Barretto, at John Lloyd Cruz na ididirehe ni Chito Rono.

Nakaugalian na namin na kapag may write-ups kami kay Ibyang ay tina-tag namin siya sa Facebook account niya para mabasa kasi nga hindi naman siya nakabibili ng diyaryo dahil sosyal ang subdibisyon niya at malalayo sa news stand.

Nakatanggap kami ng tawag kahapon kay Ibyang na sinagot namin kaagad sa pag-aakalang magpapasalamat, pero naloka kami dahil matinis ang boses niya.

“Kaloka, bawal pang i-post ‘yang pictures ko bawal, hindi puwede. San mo nakuha ‘yan?” tanong sa amin.

In fairness, hindi galit si Ibyang sa amin, sadyang matinis lang ang boses niya dahil ‘pag galit siya, hindi ka kikibuin.

Paliwanag sa amin ni Ibyang, sinabihan daw siya ng Star Cinema publicity director na si Mico del Rosario na bawal pang ipalabas ang mga litrato niyang nakadamit lalaki.

“Noong nagpuntahan ang mga kaibigan ko sa set, hindi nila ako nakilala kaya noong nalaman nilang ako na, panay ang picture-picture nila, kodakan ng kodakan, eh, kabilin-bilinan ni Mico, ‘wag daw ilalabas kasi pang-surprise nga sa movie.

“Eh, hindi ko naman alam na itong mga kaibigan ko, eh, pinagpo-post nila sa FB nila ‘yung pictures ko, kaya tiyak doon mo nakuha ‘no?” tanong sa amin ni Sylvia.

Um-oo kami at since nasa social media iyon, ateng Maricris ay for public viewing iyon, ‘di ba at puwedeng i-grab. (OO naman—ED)

At natuwa kami dahil first time naming nakitang nakadamit panlalaki ang aktres kaya isinulat namin.

“Yari ako kay Mico, ikaw bahalang sumagot doon. Wala akong alam d’yan,” bilin sa amin ng aktres.

Anyway, kinumusta namin ang reaksiyon ng mga anak ni Ibyang nang makita siyang nakadamit lalaki at natawa kami sa kuwento niya.

“Sina Ria (panganay) at Gela (pangatlong anak), sabi sa akin, ‘mom, please don’t be a lesbian, ‘wag ka mahahawa.

“Si Xavi (bunso), usually kasi kapag umuuwi ako at iki-kiss ko siya nakadamit babae galing ng’ Be Careful’, eh, noong umuwi ako na nakapantalon at polo, sabi sa akin ni Xavi, ‘huh? You, Boy? Boy? at panay ang tingin na nagtataka’

“Tapos ‘yung asawa ko, si Art (Atayde), sabi sa akin, ‘hayan, lumabas na talaga ang tunay na ikaw,’” Natatawa ring kuwento ni Ibyang.

Hmm, dati bang tomboy si Sylvia?

“Gaga, hindi, ganito lang talaga ako kumilos, parang lalaki, mabilis, hindi ako lady like, ayoko ng ganoon, bagal-bagal. Gusto ko mabilisan, ratsada,” paliwanag kaagad sa amin.

At ang brand daw ng brief na binili ni Ibyang, “Bench lang para mura, hindi na ‘yung mamahalin.”

Susme, mura pa ba ang Bench ngayon?

Dagdag tsika pa, “nakakatawa nga, kasi si Joy Viado (kasama sa movie), sabi niya, ‘Ibyang, nakikita brief mo, ayusin mo pantalon mo, sabi ko, ‘hayaan mo, ganyan ang mga lalaki, ‘di ba, nakikita ang brief?  Lalaki nga ako, eh.”

Ayaw ni Paulo Avelino ng ganyan (eksena sa Sana Bukas Pa Ang Kahapon).