Holdaper utas sa enkwentro

Nakabulagta sa gilid ng bangketa ang isa sa dalawang riding in tandem robbery group nang maka-enkwentro ang mga tauhan ng QCPD-Stn.6 sa Kagawad St., Area C, Brgy. Batasan Hills, QC. (ALEX MENDOZA)

PATAY ang isa sa dalawang hinihinalang holdaper nang makipagbarilan sa mga operatiba ng Quezon City Police District (QCPD) sa Baranngay Batasan ng lungsod, kamakalawa ng gabi.

Sa ulat kay Supt. Eleazar Matta, hepe ng QCPD Batasan Police Station 6, patuloy pang inaalam ang pagkakakilanlan sa napatay na holdaper.

Sa ulat, hinoldap ng dalawang suspek si Melinda Librado, 50, ng Quezon City.

Dakong 9 p.m. nag-aabang ng masasakyan si Librado sa Litex Road, Barangay Batasan nang huminto sa tabi niya ang isang motorsiklo lulan ang dalawang holdaper na agad siyang tinutukan ng baril saka kinuha ang dalang bag bago tuluyang tumakas.

Ipinagbigay-alam ni Librado ang insidente sa nagpapatrolyang mobile car ng Station 6 kaya agad nahabol ang mga suspek.

Namataan ng mga pulis ang dalawang holdaper na kanilang nakorner sa Kagawad St., pero imbes sumuko, pinaputukan ang mga operatiba.

Dahil dito, gumanti ang mga pulis na nagresulta sa pagkamatay ng isa sa suspek pero nakatakas ang isa pa.

Nakuha mula sa bumulagtang suspek ang kalibre .45 baril at ang bag na positibong kinilala ng hinoldap na ginang. Walang nakitang pagka-kakilanlan sa napatay na suspek.

(Almar Danguilan)