Rochelle, haciendera sa lupain ng dyowang si Arthur

ni  Reggee Bonoan

PARANG eksena sa master-seryeng Ikaw Lamang  (serye ng Dos) ang buhay ni Rochelle Pangilinan  Ateng Maricris dahil haciendera pala siya sa taniman ng tubo sa Iloilo sa nirerentahang lupa na pag-aari ng boyfriend niyang si Arthur Solinap.

“Nagrerenta ako sa lupa ni Art na tinaniman ng sugar cane kasi ayaw na niya. Sabi ko nga sa kanya, kikita ako riyan sa tubuhan ng malaki.

“Kasi siguro si Art, doon siya lumaki, so nagsawa, nasanay lang siya na anytime nandiyan lang (lupa) kung gusto niyang bumalik,” kuwento ni Rochelle.

Kuwento pa, ”maliit muna nag-umpisa kasi nakakatakot kapag malakihan agad. Sa ngayon mayroon na kaming 16 hectares at isang 5 hectares.

“Magkakaiba kasi at nakapag-harvest na kami last month (Marso), hindi pa ROI (return of investment) kasi malaki ‘yung inilabas kong pera.

“Madali lang naman tumubo ang tubo kasi maganda naman ang lupa roon (Iloilo).  Kinuha ko lang land, pero ngayon ang dami ng tubo, sa umpisa lang naman mahirap, pero ‘pag nag-start na, madali na,” nakangiting kuwento ni Rochelle.

Tatay daw ni Arthur ang nagma-manage dahil nga nasa Maynila si Rochelle,”

kasi si tito (tawag ni Rochelle sa daddy ng boyfriend) bilang nag-uumpisa palang kami, tinutulungan niya kami. Kumbaga, nakikisabay lang kami ni Art.”

At ang payo ni Rochelle sa mga naglabas ng pera ay huwag mag-expect ng balik.

“Hindi ko na ini-expect na babalik, kasi negosyo yan, eh. Hindi naman lahat kasi kumikita sa pinasukang business,” katwiran sa amin.

At natawa kami sa kuwento ni Rochelle dahil si Arthur pala ang nag-encourage na magnegosyo siya pero hindi ipinayo ang sugar cane.

“Ayaw niya (Arthur) ang tubuhan, kasi nga siguro lumaki siya roon, kumbaga nagsawa na.

“Lumaking kaya niyang makuha lahat like anytime gustong magpakatay ng baka, puwede, lahat ng gustong kainin, puwede.

“So nagpunta ng Maynila kasi ayaw na ni Art ng ganoong buhay, gusto niya ibang challenge.

“Eh, sabi ko, kapag nabuntis ako, gusto ko roon tayo sa Iloilo, parang ako ‘yung doon lumaki, ‘di ba? Gusto ko kasi roon magbuntis, gusto kong i-feel o namnamin ‘yung nine months.

“So, out sa showbiz muna ako during buntis ako, kaya ngayon, magtatrabaho muna ako habang hindi pa ako buntis.  Ganoon ako mag-isip,” kuwento pa ng dalaga.

Samantala, kasama rin si Rochelle sa indi film na Asintado kasama ang kapatid niya sa PPL na siGabby Eigenmann na ipalalabas sa Hulyo.

“First indie film ko at kontrabida ako. Luka-luka ako roon at jowa ko rito si Raymond Bagatsing na sobrang in-love kaya nagawa kong pumatay ng tao para lang sa kanya.

“Bale may saltik ako sa movie, talagang inaral ko ang role ko,” kuwento ni Rochelle.

Bihiran naman na raw sumayaw ngayon si Rochelle at out of town na lang daw ang tinatanggap niyang projects, ”para sa pang-araw-araw na gastusin.”