Website ng UST hospital na-hack (Protesta vs doktora)

NAPASOK ng grupong “Global Security Hackers” ang website ng University of Santo Tomas Hospital.

Doon ay inihayag ng grupo ang kanilang pagkadesmaya at pagkondena sa anila’y pagtanggi ng isang doktora na bigyan ng serbisyo ang isang manganganak na pasyente.

Kasunod ito nang kumalat sa social media post na sinasabing tinanggihan ni Dr. Anna Liezel Sahagun na tanggapin sa nasabing ospital ang manganganak na si Siarra Pelayo dahil hindi makapagbayad ng P20,000 deposito.

Kasama ni Pelayo ang kanyang asawa na si Andrew noong Pebrero 19 nang naganap ang nasabing insidente.

Sa nasabing social media post, sinabi ni Andrew, nang malaman ni Sahagun na hindi sila makapagbabayad ng deposito, ini-refer sila sa isang government hospital sa kabila nang maselan na kondisyon ng pagdadalantao ng kanyang asawa.

Agad silang nagtungo sa Jose Reyes Memorial Medical Center (JRMMC) ngunit bumalik din sa UST Hospital nang malaman na walang incubator sa JRMMC.

At nang makabalik muli sa UST, muling ini-refer sila sa East Avenue Medical Center sa Quezon City.

Ngunit huli na ang lahat dahil hindi na naisilang nang buhay ang sanggol habang nakaligtas sa pagkalason ang ina.

Ayon sa nasabing grupo ng hackers, mali at malaking paglabag sa sinumpaang tungkulin ang ginawa ni Dr. Sahagun.

Nananawagan din sila sa mga kinauukulan na magsagawa ng imbestigasyon sa nasabing insidente.

Samantala, wala pang official statement ang ospital sa isyung ito.