Solon, 2 buwan suspendido sa US junket trip

SINUSPINDE ng Sandiganbayan Second Division sa loob ng dalawang buwan si South Cotabato 1st District Rep. Pedro Acharon, Jr., kaugnay ng kanyang kasong katiwalian dahil sa sinasabing junket trip sa Estados Unidos noong 2006.

Matatandaan, nagtungo si Acharon sa California, USA, kasama ang apat na opisyal ng General Santos City para sa Tambayayong Festival.

Ang South Cotabato solon ay dating alkalde ng GenSan at responsable noon sa paglalabas ng pondo para ano mang aktibidad ng kanyang nasasakupan.

Para sa prosekusyon, pagwawaldas ng pondo ang ginawa ng grupo ng mga respondent, lalo’t umabot sa P2.5 milyon ang kanilang gastos.

Sa panig ni Acharon, bilang kasalukuyang mambabatas ay wala siyang kapasidad na mag-release ng budget kaya hindi na siya dapat na suspendihin.

Gayonman, kinontra ito ng korte dahil ano man ang posisyon ng inaakusahang government official ay maaari siyang suspendihin kung nananatili pa rin siya sa gobyerno.

Kaugnay nito, inatasan ng anti-graft court si House Speaker Feliciano Belmonte para ipatupad ang nasabing suspension order.