Matinding trapik sa NCR kayang ayusin — Palasyo (Amcham minaliit)

HINDI naniniwala ang Malacañang sa naging pagtaya ng American Chamber of Commerce (Amcham) na hindi na maaaring tirahan ng tao ang Metro Manila kung hindi mareresoba ang traffic congestion.

Sinabi ni Communications Sec. Sonny Coloma, may ginagawa na rito ang pamahalaan at ipinatutupad na upang tumugon sa pangangailangan ng mga mamamayang naninirahan at naghahanapbuhay sa NCR at kanugnog na rehiyon.

Ayon kay Coloma, inaprubahan na ng NEDA Board noon pang Hunyo 2014 at ipinatutupad na ang mga batayang prinsipyo ng Mega Manila Dream Plan o Roadmap for Transport Infrastructure Development for Metro Manila and Its Surrounding Areas including Calabarzon and Central Luzon.

Aniya, ito ay rekomendasyon mismo ng JICA para maibsan ang pagsisikip ng trapiko at polusyon sa Metro Manila.