Militanteng kabataan, mga pulis nagsalpukan

NABALOT ng tensiyon ang protesta sa Liwasang Bonifacio nang tangkain ng mga kabataang makalusot sa barikada ng mga pulis, Huwebes ng umaga.

Habang nagsasagawa ng programa, may isang grupo ng kabataang lumapit sa barikada ng mga pulis at agad nang sumugod ang iba pa nilang mga kasama.

Nauwi sa balyahan at pukpukan ang pagtatagpo ng dalawang hanay.

Nagawang paatrasin ng mga pulis ang ilan sa mga kabataan.

Ang ilang nakalusot patungong Manila City Hall ay agad sinundan ng mga pulis.

Sa Liwasang Bonifacio nagpalipas ng gabi ang mga militante at maaga silang naglunsad ng programa.

Sinunog nila ang replika ng watawat ng Estados Unidos na sinasabi nilang pasimuno ng imperyalismo.

Kanila ring binatikos ang paggugol ng bansa ng bilyon-bilyon para sa Asia-Pacific economic leaders’ meeting na anila’y pinakikinabangan lamang ng mayayamang bansa at mga negosyante.