World best cuisines itinampok sa 1st Makati Food Festival

INILUNSAD ng city government ng Makati sa pamamagitan ng City Museum and Cultural Affairs Office (MCAO), ang unang Makati Food Festival (MFF) na nagtampok sa Filipino at international cuisines nitong Nobyembre 6-8, 2015 sa Greenbelt 3 Park, Ayala Center.

Sinabi ni Acting Mayor Kid Peña, ang tatlong araw na food festival ay nagtampok ng cooking demonstrations na pinangunahan ng renowned chefs at nagkaroon ng libreng food tasting.

Aniya, ang event ay naglalayong magbuo ng venue na itatampok ang pinakamasarap na Filipino cuisines at mga putaheng mula sa ibang bansa.

“We are happy that our city is finally launching its very own food festival. We will be having cuisines from Germany, Spain, Portugal, Belgium, and Indonesia, and a whole lot more. People will learn them through cooking demonstrations, and the best part is, they will enjoy it too as there will be food tasting,” pahayag ni Peña.

Pangungunahan ng apat na renowned chefs ang cooking demonstrations sa nasabing event.

Sa pagbubukas ng food festival nitong Biyernes, Nobyembre 6 dakong 5 p.m., si Chef Bambi Lichauco ang nanguna sa cooking demonstration.

Noong Sabado, Nobyembre 7, dakong 11 p.m., si Chef Nancy Reyes Lumen, kilala bilang si “Adobo Queen,” ang nanguna sa cooking demo, habang si Chef Jean Manuel Montil ang humalili dakong 5 p.m.

Sa huling araw ng food festival, Linggo, Nobyembre 8, isang chef mula sa Calidad Española Co., food company ng authentic Spanish chorizos, ang nagsagawa ng cooking demonstration dakong 11 a.m.

Kabilang sa mga lumahok sa 1st Makati Food Festival ang Filipino Heritage Festival, Ayala Center, Greenbelt, Glorietta, Belinyas, Brakinho, Fly Ace Corp, German Club, Embassy of Indonesia, Italfood and Mgourmet at iba pa.