Abogadong chickboy pinatawan ng disbarment

TINANGGALAN ng lisensiya o pinatawan ng disbarment na mag-practice ng abogasya ang isang abogado na inaakusahang nambabae o nakikiapid.

Sa ‘unanimous’ o nagkakaisang desisyon ng mga mahistrado ng Korte Suprema, inaprubahan nila ang rekomendasyon ng IBP Board of Governors laban kay Atty. Ian Raymond Pangalanan, napatunayang guilty sa gross immorality at paglabag sa Section 2, Article 15 ng 1987 Constitution, tumutukoy sa kahalagahan ng kasal.

Nag-ugat ang kaso sa inihaing reklamo ni Atty. Roy Ecraela noong 2007.

Reklamo ni Ecraela, mula 1990 hanggang 2004, papalit-palit o kung minsan ay pinagsasabay-sabay ni Pangalangan ang pakikipagrelasyon sa mga babae na ang ilan ay kasal o may-asawa na.

Kabilang sa mga nakarelasyon ng inireklamong abogado ay asawa mismo ni Ecraela.

Mismong si Pangalangan ay mayroon ding asawa.

Ito ay maituturing na ‘malpractice gross misconduct’ at ‘gross immorality’ na paglabag sa Lawyer’s Oath.

Dahil dito, iniutos ng Korte Suprema na alisin sa ‘Roll of Attorneys’ ang pangalan ni Pangalangan.

Ayon sa Korte Suprema, walang karapatang mapabilang sa mga abogado ng bansa si Pangalangan dahil sa immoralidad na ipinakita na hindi lang labag sa sinumpaan niyang propesyon kundi maging sa batas.