‘Panic’ lang ‘yan — Sen. Trillanes

NAKAHANDA si Sen. Antonio Trillanes IV na sagutin sa korte ang P200 million damage suit na isinampa sa kanya ni Vice President Jejomar Binay sa Makati Regional Trial Court.

Ayon kay Trillanes, hindi siya natatakot sa kaso at patuloy na ibubunyag ang mga katiwalian ni Binay.

Malinaw aniya na nagpa-panic na si Binay sa mga kontrobersiyang kinasasangkutan kaya tinatakot na ang mga taong umuusig sa kanya.

“Nagpapakita lang ito na nagpa-panic si VP Binay kaya sinusubukan na lang niyang takutin ang mga taong umuusig sa kanya. Gayonpaman haharapin natin itong kasong ito sa korte at ipagpapatuloy pa rin namin ang pagbubunyag sa mga katiwaliang ginawa niya,” ani Trillanes.

Bukod kay Trillanes, kasamang kinasuhan ni Binay sina Senate Majority Leader Alan Peter Cayetano, dating Makati Vice Mayor Ernesto Mercado, Ombudsman Conchita Carpio-Morales at iba pa.

Sina Trillanes, Cayetano at Mercado ang unang nagbunyag sa sinasabing mga katiwalian na kinasasangkutan ni Binay noong siya pa ang mayor ng Makati City.

Cynthia Martin