Ginang patay sa tusok ng metal fence (Sa anti-drug raid)

CEBU CITY – Nagmistulang barbecue ang isang ginang nang matusok ang katawan sa matulis na kabilya na ginawang metal fence sa gitna ng anti-drug raid sa Sitio Mahayay, Brgy. Calamba, Lungsod ng Cebu kamakalawa.

Kinilala ang namatay na si Maria Lisa Diaz, live-in partner ng suspek na target sa police operation.

Tumalon si Diaz mula sa bubong upang hindi mahuli ng mga pulis na nagsasagawa ng raid sa nasabing lugar.

Ayon kay City Intelligence Branch head Supt. Romeo Santander, nakapanlulumo ang sinapit ng ginang dahil natusok ang balakang niya ng kabilya at tumagos sa dibdib.

Aniya, pahirapan ang pagkuha sa katawan ng biktima dahil kinakailangan pang gamitan ng metal saw.

Umabot sa isang metro ang haba ng kabilya na nakabaon sa katawan ni Maria Lisa nang dinala sa pagamutan ngunit idineklarang dead on arrival ng mg mga doktor.

Isinagawa ang naturang raid sa bahay ng biktima nang nagpositibo sa surveillance na nagtutulak ng shabu.

Nang nakapasok na ang mga awtoridad sa bahay ay nabulabog ang mga parokyano na naroroon.

Ang iba ay pumunta sa bubong kasama ang biktima.

Nabatid na may limang exit ang bahay kaya wala ni isa ang naaresto dahil mabilis tumakbo ang mga suspek.

Ang nasabing bahay na siyang drug den ay pangalawang beses nang na-raid ng pulisya at tanging nadatnan lang ang mga bulto-bultong shabu.