Star Magic coordinator kritikal sa taxi driver/holdaper

KRITIKAL ang kalagayan ng isang program coordinator ng Star Magic ng ABS CBN Channel 2 makaraan holdapin at saksakin ng taxi driver sa Ermita, Maynila kamakalawa ng gabi.

Ginagamot sa Jose Reyes Memorial Medical Center ang biktimang si Julia Ballesteros, 38-anyos.

Habang nagsasagawa ng manhunt operation ang mga tauhan ng Manila Police District Sta. Cruz Station (PS3) laban sa suspek na driver ng taxi (UVU 342 or 324).

Ayon kay PO3 Allan Andrew Mateo, dakong 7 p.m. nang ideklara ang holdap sa T.M. Kalaw St., Ermita, Maynila.

Nabatid na sumakay ang biktima dakong 6:30 p.m. sa M.Y. Orosa St., Malate, Maynila para magpahatid sa Sampaloc, Maynila.

Ngunit habang binabagtas ang Roxas Blvd., sinabi ng biktima sa suspek na buksan ang bintana ng taxi dahil may naamoy siyang mabaho.

Pero itinigil ng suspek ang taxi sa madilim na lugar ng T.M. Kalaw St., saka nagdeklara ng holdap. Nanlaban ang biktima ngunit sinaksak siya ng suspek.

Pagkaraan ay ibinaba ng suspek ang biktima sa Severino Reyes St., Sta. Cruz, Maynila.

(LEONARD BASILIO)