HATAW! D'yaryo ng Bayan hatawtabloid.com
HINDI natitinag ang Bangsamoro Islamic Freedom Fighters (BIFF) sa idineklarang all-out defensive na iniutos ni Armed Forces of the Philippines (AFP) Chief Gen. Gregorio Catapang laban sa kanila.
Giit ni BIFF spokesperson Abu Misry Mama, nakahanda sila sa puwersa ng militar.
“Para silang mga aso na tahol nang tahol hindi naman kumakagat. Marami na silang sinabi na opensiba, all out war, wala namang nangyayari dito. Matagal na itong uubusin pero silang nauubos e.
“Kung magkasalubong tayo, e di lalaban tayo. Inshaallah. Kung saan ang makabubuti sabi ni Allah, yun ang gagawin namin.”
Una nang naitaboy ng pinagsanib na pwersa ng militar, Philippine National Police (PNP) at Moro Islamic Liberation Front (MILF) ang BIFF sa boundary ng Pagalungan, Maguindanao at Pikit, Cotabato.
Sa kabila nito, kompiyansa si Mama na mahihirapan na ang mga sundalo na mahanap sila.
“Mahirap naman kaming atakehin, wala kaming kampo e. Kahit na saan kami nila hanapin, hindi nila kami makikita. Kung magtago kami kasi, nasa city kami, nasa poblacion, mag-merienda, magkape-kape. Kaya pagbalik nila sa mga checkpoint nila, patay kang bata ka.”
Nagmatigas din ang mga rebelde na ibalik ang mga baril ng PNP Special Action Force (SAF) troopers na nakasagupa sa Mamasapano, Maguindanao noong Enero 25.
Banta ng BIFF spokesperson, “Yung mga baril na narekober natin yun ang isauli natin, yung bala, hindi baril. Yung bala ibabaril namin sa kanila.”
Nanindigan ang militar sa pagsugpo sa mga rebelde.
Utos ni PNoy sa AFP
COLLATERAL DAMAGE IWASAN SA OPENSIBA
TINIYAK ng Malacañang na malinaw ang direktiba ni Pangulong Benigno “Noynoy” Aquino III sa AFP na pangalagaan ang seguridad ng mga komunidad at iwasan ang pagkakaroon ng collateral damage sa civilian communities habang nagsasagawa ng opensiba laban sa Bangsamoro Islamic Freedom Fighters (BIFF).
Sinabi ni Communications Sec. Sonny Coloma, mayroon nang na-displace na 3,000 pamilya o katumbas ng humigit-kumulang 15,000 katao sa Central Mindanao.
Ayon kay Coloma, puspusang kumikilos ang pamahalaan upang mabigyan sila ng kaukulang pagtulong at tiyakin ang kanilang maayos na kalagayan.
