3 pusakal todas sa CSJDM cops (Sa Oplan Lambat Sibat)

BUMAGSAK na walang buhay ang tatlong lalaking sinasabing sangkot isa iba’t ibang criminal activities, makaraan makipagpalitan ng putok sa mga tauhan ng Bulacan Police habang inaaresto sa sinalakay na isang bahay sa hangga-nan ng bayan ng Norzagaray at ng Lungsod ng San Jose del Monte, sa Bulacan kahapon.

Ang pagsalakay ay isinagawa dakong 5 a.m. bilang bahagi ng ipinatutupad na malawakang kampanya ng pulisya na “Oplan Lambat-Sibat” laban sa gumagalang mga kriminal na naghahasik ng kanilang illegal na mga aktibidad sa maraming mga lugar sa Bulacan.

Sa inisyal na ulat na isinumite sa tanggapan ni Bulacan Police Director, Sr. Supt. Ferdinand Divina, bago nakalapit sa lugar ang isang grupo ng mga pulis ay sinalubong na sila ng bala ng mga suspek.

Bunsod nito, gumanti ng putok ang mga pulis na ikinamatay ng tatlong hindi pa nakilalang mga suspek.

Narekober mula sa pag-iingat ng napatay na mga suspek ang siyam na  iba’t ibang kalibre ng baril, 14 nakaw na motorsiklo, at ilang plastic sachet ng shabu.

Daisy Medina