Depensa ni Kris kay Pnoy normal lang – Palasyo

BINIGYANG-DIIN ng Malacañang na normal lang na ipagtanggol ni Kris Aquino ang kanyang kapatid na si Pangulong Benigno “Noynoy” Aquino III laban sa mga batikos.

Kaugnay pa rin ito ng mga batikos sa pangulo dahil sa pag-isnab sa arrival honors ng labi ng tinaguriang “Fallen 44” sa Villamor Air Base kamakailan.

Ayon kay Presidential Communications Operations Office Secretary Herminio Coloma Jr., alam ng lahat na talagang malapit ang Aquino sisters sa pangulo kaya sa bawat pagkakataon ay sinusuportahan ang isa’t isa.

“Batid naman po natin na malapit ang pagsasamahan ng Pangulo at ng kanyang mga kapatid. Sila po ay isang well-knit family at madali naman po nating maunawaan na sa bawat pagkakataon ay nagbibigay sila ng suporta at encouragement sa isa’t isa,” ani Coloma.

Matatandaan, idinaan ng TV host/actress sa kanyang social media sites at TV program ang pagbuwelta sa mga bumabatikos sa kanyang kuya Noy.

Katunayan ay nakatampuhan ngunit nakipag-ayos na rin ang presidential sister sa kaibigang celebrities gaya nina Judy Ann Santos at mag-asawang Regine at Ogie Alcasid.