‘Di isusuko ng MILF lahat ng baril (Duda ni Kabalu)

KORONADAL CITY – Duda si dating Moro Islamic Liberation Front (MILF) spokesman at ngayon vice chairman ng Bangsamoro Transformation Council Eid Kabalu na masusunod nang siyento porsiyento ang napagkasunduan sa decommissioning o pagsusuko ng mga armas ng lahat ng mga mandirigma ng MILF.

Sinabi ni Kabalu, iba ang nilagdaang papel sa magiging implementasyon nito lalong lalo na sa ground.

Ipinaliwanag niyang parang nakaugalian na sa bansa na hindi nasusunod ng 100 percent ang mga nakalagay sa agreement ng dalawang panig partikular na ng GRP at MILF peace panel.

Ngunit naniniwala siyang kailangang sundin ng MILF kung ano ang napagkasunduan.

Ipinagdiinan din ni Kabalu na dapat lamang maipasa ang Bangsamoro Basic Law (BBL) at hindi maapektohan ng Mamasapano encounter dahil masasayang lamang ang dekadang pakikipaglaban na makamit ang kapayapaan sa Mindanao.

Hindi rin aniya dapat na isisi sa lahat ng kasapi ng MILF ang kasalanan ng isa o dalawang commanders na nakasagupa ng SAF troopers.