Epal na politiko negosyante sinupalpal ng Palasyo (Sa Papal Visit)

NANAWAGAN ang Palasyo sa mga politiko’t negosyante na maghunusdili sa pag-epal sa pagdating ni Pope Francis at gawin na lamang ang kanilang pagpapasikat sa ibang pagkakataon.

Sinabi ni Communications Secretary Herrminio Coloma Jr., ang sentro ng pagtitipon-tipon ng mga Filipino ay ang Santo Papa kaya’t dapat ay siya lamang ang sentro ng atensiyon.

Nauna nang nag-abiso ang Simbahan na hindi papayagang pumapel ang mga politiko dahil ang gustong makasalamuha ni Pope Francis ay ang mga pangkaraniwang tao.

Giit ni Coloma, pumili na lamang ng ibang okasyon ang mga naghahangad na mapansin dahil baka maaga silang mahusgahan ng taong bayan.

Sa nakatakdang courtesy call ni Pope Francis sa Malacanang, si Pangulong Benigno Aquino III ang pipili ng mga politikong maaaring makapasok sa Palasyo para makita ang Santo Papa.

Rose Novenario