10 Bilibid inmates pa inilipat sa NBI

SAMPU pang notoryus na preso sa New Bilibid Prison (NBP) ang inilipat sa pangangalaga ng National Bureau of Investigation (NBI) sa Taft Avenue, Maynila.

Ang paglilipat sa mga preso ay kasunod nang ikatlong pagsalakay sa NBP sa Muntinlupa na isinagawa ng Department of Justice, NBI at ng Philipiine National Police.

Kabilang sa mga inilagay sa kostudiya ng NBI at pinaniniwalaang sangkot sa illegal drugs trade ay sina Jim Pasco, Joselito Valiente (konektado sa Batang Cebu), Noel Arnejo, Engelberto Durano, at Brando Ramirez, pawang mga kilalang drug lord sa Kabisayaan.

Sa ikatlong raid, nakompiska ng mga awtoridad ng maraming cellphones, cellphone signal boosters, mga patalim, sex toys at P700,000 cash.

Ang mga kontrabando ay narekober ng NBI sa tatlong magagarang kubol na pag-aari ng limang drug lord.

Ang mga cellphone ay nakita ng NBI na nakadikit sa ilalim ng mga upuan, sa pagitan ng mga libro, sa loob ng kisame at mga tagong divider ng mga kubol.

Ngunit itinuturing ni Justice Secretary Leila de Lima na ang pinakamabigat na nakompiska ng bureau sa raid ay ang mga blackbook na nagpapatunay nang lawak ng operasyon ng mga drug lord at kanilang daan-daan libong pisong transaksiyon na ang pinakahuli ay noong nakaraang Huwebes at Biyernes.

Dahil dito, ay iniutos ni De Lima na ilipat sa NBI jail ang nasabing drug lords.

Bukod sa limang drug lord, inilipat na rin sa NBI ang lima pang preso na hinihinalang sangkot sa pagpapasabog sa granada noong Enero 8 na ikinamatay ng isang preso at ikinasugat ng 19 iba.

Sa kasalukuyan, umaabot na sa 29 high profile inmates ang nasa pasilidad ng NBI na resulta ng sunod-sunod na pagsalakay sa pambansang piitan.

Leonard Basilio