Bahay ng suspek sa indiscriminate firing sinalakay (Sa Ilocos Sur)

VIGAN CITY – Bigo ang pamunuan ng pambansang pulisya sa probinsiya ng Ilocos Sur na makompiska ang lahat ng mga baril na ginamit noong Bagong Taon sa Brgy. San Antonio, sa bayan ng Narvacan.

Sinalakay ng pinagsanib na pwersa ng Ilocos Sur Police Provincial Office (ISPPO) at regional intelligence division, ang nasabing barangay.

Isinagawa ang raid sa pangunguna ni ISPPO acting director Senior Supt. Nestor Felix, kasama ang CIDT-Ilocos Sur, regional intelligence division, regional public safety battalion (RPSB), provincial intelligence branch at kinatawan sa media at sa bisa ng search warrant na ipinalabas ni Judge Marita Balloguing, RTC Branch 20 Vigan City, at hinalughog nila ang bahay nina Cesar Funtanilla at Geronimo Gomez.

Ngunit sa kabila nito, pursigido ang provincial director na mapanagot ang mga nagkasala sa nangyaring pagpapaputok ng baril.

Una rito, sinampahan ng kasong alarm and scandal ang mga suspek sa indiscriminate firing na sina Ian Christopher Calixterio, Russel Funtanilla, Cezar Funtanilla, Mark RJ Cabana, Philip Andrew Funtanilla, Mark Cachola, Jumar Cabreros, at Geronimo Gomez.

Kinompirma ng police director na isa sa mga sangkot sa indiscriminate firing ay anak ng pulis, ngunit hindi niya pinangalanan dahil nagpapatuloy pa ang imbestigasyon sa insidente.