Dila ng med student nilaslas ng holdaper

MUNTIK maputulan ng dila ang babaeng 29-anyos medical student nang laslasin ng isang holdaper makaraan magsisigaw ang biktima upang humingi ng tulong habang hinoholdap ng suspek sa Valenzuela City kahapon ng umaga.

Kinilala ang biktimang si Maria Regina Gabriel, estudyante ng Our Lady of Fatima University (OLFU), residente sa F. Bautista St., nilalapatan ng lunas sa pagamutan dahil sa sugat sa dilang hinatak at nilaslas ng suspek.

Habang nakatakas ang hindi nakilalang suspek tangay ang bag ng biktima na naglalaman ng mamahaling gamit pang-medikal sa kanyang pag-aaral, iPhone 4s at P1,500 cash.

Sa tinanggap na ulat ni Valenzuela police chief, Senior Supt. Rhoderick Armamento, naglalakad papasok sa pamantasan ang biktima dakong 6 a.m. nang harangin ng suspek na armado ng patalim sa kahabaan ng Bautista St.

Tinutukan at itinulak ng suspek ang biktima sa pader sabay deklara ng holdap ngunit sumigaw ang estudyante sa paghingi ng tulong kaya’t hinatak ng salarin ang kanyang dila at nilaslas.

Bunsod ng sigaw ng biktima ay lumabas sa kanilang bahay ang mga residente kaya mabilis na tumakas ang suspek.

Rommel Sales