HATAW! D'yaryo ng Bayan hatawtabloid.com
DALAWA ang patay at dalawa ang sugatan sa insidente ng akyat-bahay sa Don Manuel St., Sto. Domingo, Quezon City dakong 6 a.m. kahapon.
Ayon sa senior citizen na may-ari ng bahay at ng katabing Chinese temple, nagwawalis ng bakuran ang kanyang mister nang pwersahang pasukin ng tatlong suspek saka itinali at binusalan silang mag-asawa at kanilang anak.
Makaraan limasin ang ilang gadget at pera ng mag-anak, naghugas pa aniya ng paa sa banyo ang isa sa mga suspek na pawang armado ng baril.
Sa puntong iyon nakakuha ng pagkakataon ang pamilya para makatawag ng mga barangay tanod na agad nagresponde.
Napatay sa ikalawang palapag ng bahay ang isa sa mga tanod na si Salvador Nagtalon habang sugatan ang dalawa niyang kasama.
Nagkahabolan ang nagrespondeng mga pulis at mga suspek, at napatay ang isa sa mga akyat-bahay nang makorner sa banyo ng isang pinagtaguang bahay sa bahagi ng Maria Clara Street na pag-aari pala ng isang pulis.
Arestado ang isa pang suspek sa La Loma habang nakatakas ang isa pa.
Patuloy ang imbestigasyon lalo’t hinala ng mga biktima may kasabwat na isa sa kanilang tauhan ang mga suspek.
(JETHRO SINOCRUZ)
