Pamilyang Tsinoy pinasok ng Gapos Gang

MILYON halaga ng salapi, mga alahas at iba pang mahalagang kagamitan ang tinangay ng apat ng miyembro ng “Gapos Gang” kamakalawa ng umaga sa Valenzuela City.

Kinilala ang mga biktimang sina Sengka Alfredo Lee, negosyante at misis na si Maria Theresa, kapwa residente ng 144 V. Cordero St., Brgy. Marulas, ng nasabing lungsod.

Sa ulat ni SPO3 Armando De Lima, dakong 7:00 a.m., nang maganap ang insidente nang pasokin ang bahay ng mga biktima.

Pahayag sa pulisya ni Maria Theresa, kasama niya ang dalawang anak na edad 13 at 15, paalis sila ng bahay sakay ng Toyota Fortuner (ZSB-576)  nang salubongin ng apat na suspek na pumasok sa kanilang garahe.

Pilit silang pinababa ng mga suspek habang nakatutok ang mga baril, kinaladkad papasok kasama ang dalawang kasambahay sa loob ng kuwarto ni Sengka na natutulog saka iginapos ang mga paa at kamay ng mag-anak.

Matapos limasin ang mga pera at kagamitan ng mga biktima, tumakas ang mga suspek sakay ng getaway vehicle na nakaabang sa labas ng compound.

(ROMMEL SALES)