HATAW! D'yaryo ng Bayan hatawtabloid.com
BINARIL sa ulo ng hindi nakilalang suspek ang lider ng isang transport group sa siyudad ng Makati, kamakalawa ng gabi .
Nadala pa sa Ospital ng Makati ang biktimang kinilalang si Bemindo Jose, 63, pangulo ng Highway-54 Pateros Drivers Association (HIPADA), ng 174 Dalandan St., Brgy. Comembo, pero binawian ng buhay sanhi ng tama ng bala ng hindi pa batid na kalibre ng baril sa ulo.
Sa imbestigasyon ni SPO1 Jason David ng Makati police Homicide Section, dakong 9:00 ng gabi nang mangyari ang pamamaslang sa Pateros Old Terminal, sa P. Victor St., Brgy. Guadalupe Nuevo.
Sa pahayag ng testigong si Rene Robosa, chairman of the board ng HIPADA, hinihintay niya ang biktima upang isakay sa minamaneho niyang motorsiklo nang mapansin niya ang paglapit ng isang lalaki at biglang binaril sa ulo ang biktima.
Kaagad tumakas ang suspek patungo sa loob ng Guadalupe mall matapos ang pamamaslang.
Blanko ang pulisya sa motibo sa nasabing pagpatay pero may hinala ang mga awtoridad na posibleng hindi pagkakaunawaan sa loob ng organisasyon ang isa sa mga ugat ng krimen.
(JAJA GARCIA)
